Grazas a todas e todos!!!!!!!!!

O Museo Galego da Marioneta pecha pola realidade burocrática e os incumprimentos do Concello para garantir o funcionamento do proxecto expositivo

Viravolta reúne á prensa para explicar as razóns da desaparición do centro e achácalle ao Concello de Lalín demoras nos prazos, incumprimentos e falta de comunicación que en nada axudaron para a supervivencia do Museo

Martes, 21 de maio-. O Museo Galego da Marioneta pecha pola fartura que provoca bater coa realidade burocrática, pola demora institucional para outorgarlle unha entidade xurídica tras 19 anos de traxectoria e polos incumprimentos do Concello para dar unha solución defintiva que garanta o funcionamento deste Museo que convertía o Deza nunha capital de referencia para o teatro de monicreques. Así resumiron os integrantes de Viravolta Títeres –Pilar Álvarez, Julio Balado e Anxo García– os motivos do peche no Café Camilo, onde a compañía convocou a prensa para explicar a súa posición máis alá do comunicado que se fixo público a semana pasada.

Neste sentido, Viravolta Títeres lembrou que o Museo Galego da Marioneta se fundou en 2001 pola vontade desta compañía e do Concello de Lalín para dotar ao municipio dun espazo para amosar non só a súa colección de marionetas, senón un conxunto expositivo de gran valor histórico e etnográfico que se armou nestes anos a través de doazóns e depósitos até superar as máis de trescentas pezas. Os seus fondos inclúen coleccións tradicionais chegadas dende países como Chequia ou Bélxica, pezas facilitadas por compañías galegas como Cachirulo, Tanxarina, Os Monicreques de Kukas, Artello alla Scala, Trécola, e de pezas históricas vinculadas a Barriga Verde. Ademais, o Museo conta cunha biblioteca con máis de 3.700 volumes, o cal –xunto ao seu fondo expositivo– convertían o centro “nun espazo referencial para fomentar o desfrute, a investigación e a recuperación da arte da marioneta”.

INCUMPRIMENTOS

Dende Viravolta sinalan que, malia que o Concello elaborou un anteproxecto para o Museo e desenvolveu a catalogación dos seus fondos, dando así os pasos necesarios para dotalo de entidade xurídica, ambas accións implicaban unha serie de condicións que non foron cumpridas. A compañía fai referencia así ao anteproxecto de 2017, cuxo obxectivo final é dotar de estrutura xurídica ao Museo, que ve dificultado enormemente o seu funcionamento por esta carencia, xa que resulta imposible contar con orzamentos, contratar persoal ou optar a subvencións e convenios coas administracións autonómicas e estatais.

Por outra banda, ese anteproxecto recollía a necesidade de trasladar a mostra permanente no seu emprazamento actual ás plantas superiores do Prazo Liñares, xa que a colección corre graves riscos de conservación no espazo actual. Non obstante, ese traslado nunca se materializou e as plantas superiores do inmoble foron ocupados por outras propostas.

No citado Anteproxecto, ademais, especifícase textualmente, que o “proceso para establecer as condicións que permitirán obter o debido recoñecemento da Xunta de Galicia non debería dilatarse máis de dous anos e medio” e que durante ese lapso de tempo o Museo “debería manter as súas actividades públicas”. Neste punto, prodúcese un novo incumprimento, xa que dende a elaboración do anteproxecto en 2017 non se reverteu a inactividade, situación que se arrastraba xa dende 2015. Ao respecto da catalogación, desenvolvida polo Concello no verán de 2018, o procedemento non resultou completo, porque se ben si se catalogaron máis de 300 pezas, aínda falta un gran número de pezas, incluída parte da colección de Viravolta.

FALTA DE COMUNICACIÓN

No momento en que o Concello quixo iniciar a catalogación das pezas, propiedade da compañía, Viravolta condicionou a súa execución á reactivación da actividade no ano 2018, especificándolle ao Concello que de non producirse tal recuperación, cumpriría pechar. Non obstante, o ano foi avanzando sen que se cumprise o obxectivo, motivo polo cal Viravolta se reuniu en novembro coa concelleira de Cultura, Lara Rodríguez Peña, e en decembro, co alcalde de Lalín, Rafael Cuíña, para abordar a situación. En ambas as dúas xuntanzas, solicitadas por iniciativa de Viravolta, explicouse dende o Concello a imposibilidade de poñer en marcha a actividade nese curso por cuestións administrativas, polo que se deu outro novo prazo, que se estendía até o 31 de marzo. Non obstante, nada cambiou nese tempo.

Así, a comezos de maio se adiantou de forma extraoficial ao Concello a intención de Viravolta de desistir de forma inmediata do proxecto do Museo. O día 13 de maio procedeuse dende a compañía a enviar senllos correos electrónicos á Alcaldía e ás Concellerías de Cultura e de Turismo, responsables do Pazo de Liñares, para achegarlles a decisión en firme. Só se atopou resposta de forma indirecta, a través dos medios e coas explicacións facilitadas á prensa por parte concelleira de Cultura. Esta situación amosa, dende o punto de vista de Viravolta, unha falta de comunicación que en nada axudou á supervivencia do Museo Galego da Marioneta.

Viravolta, ademais, detallou outra circunstancia que ilustra o diálogo pouco efectivo por parte do Concello. Neste senso, a compañía destacou que en 2016 se creou, tal e como se recolle no convenio entre Viravolta e o Consistorio, unha Comisión de Coordinación para o Museo, composto por membros da formación e representantes municipais e que en todo este tempo só se reuniu nunha ocasión, cando o convenio obrigaba, como mínimo, a unha xuntanza anual.

AGRADECEMENTOS

Viravolta concluíu a rolda de prensa achegando a súa gratitude e agarimo a todas as persoas que fixeron posible, mentres durou, un proxecto tan fermoso e ilusionante. Ademais, lembraron que o peche non é un capricho en pleno proceso electoral, senón que a compañía levaba dous anos comunicando ao Concello o desexo de finalizar un proxecto ao que Viravolta dedicou preto de dúas décadas de esforzo, entrega e traballo, moitas veces mesmo supeditando a viabilidade do Museo Galego de Marioneta aos intereses da propia empresa.

Advertisements
Publicado en Varios | Deixar un comentario

Saúde e marionetas

O Museo Galego da Marioneta foi unha entidade que tivo como obxectivo recuperar, mostrar e fomentar o goce, a investigación e o estudo da arte das marionetas para  construír unha obra colectiva. Un obxectivo que non se logra sen o fenómeno da “transmisión”.

A exposición de parte dos seus fondos no XX FIT Redondela, ó que convidamos asistir,  pon fin ó proxecto.

A nosa eterna gratitude e agarimo a todas e todos os que fixeron posible  – mentres durou-  un proxecto tan fermoso e ilusionante.

SAÚDE E MARIONETAS!

Publicado en Varios | Deixar un comentario

Bo nadal

E felíz 2018.

Publicado en Varios | Deixar un comentario

Programación de títere tradicional.

Os días 8 e 12 de novembro o Museo Galego da Marioneta organiza dúas funcións de títeres, aproveitando a presencia de destacadas compañías de  títere tradicional no Festival Titiriberia en Teo.

 

Z, Las Aventuras del Zorro.

O mércores día 8 de novembro ás 19:00 h.  no Museo Municipal Ramón Mª Aller de Lalín , Luca Ronga e Eudald Ferré representarán Z, Las Aventuras del Zorro.

Eudald Ferré formou parte de Pa Sucat, compañía catalana da que xa disfrutamos en Lalín con ocasión do Titirideza 2015 co espectáculo Maravillas de Oriente. Luca Ronga , italiano de Bolonia, é un dos especialistas en Pulcinella máis recoñecidos de Europa, cunha gran técnica de manipulación. A dirección do espectáculo é  de Lluis Graels.

Un Gobernador abusa do seu poder mediante un fiel exercito de soldados torpes pero O Zorro, oculto baixo unha máscara marca cunha Z aos abusadores e trae de cabeza ao Gobernador.

La muerte de Don Cristobal

O domingo 12 de Novembro, Cie Pelele reprsentará La muerte de Don Cristóbal, esta vez no Museo Galego da Marioneta-Pazo de Liñares ás 18:00 h.

Pelele é unha compañía francesa dirixida pola madrileña Paz Tatay, instalada en Toulouse.

O espectáculo está protagonizado por Don Cristóbal, o famoso personaxe de títere de cachiporra, parente de Polichinela, Punch e Barriga Verde.

Avaro, feo, perverso, sin escrúpulos, vive para aumentar a súa considerable fortuna. A súa criada, pobre, perversa e moito máis malvada que el, intentará maquinar para asasinalo, cortalo en anacos pequenos e roubalo.

Paz Tatay consigue recrear a un novo Don Cristóbal cheo de vida e forza dramática.

Publicado en Programación | Etiquetado , , , , , | Deixar un comentario

Na casiña de Fernanda Cabrera

Do 24 ao 27 de agosto celébrase en Lalín o Titirideza. Os espectáculos que conforman a programación do Titirideza 2017  teñen en común que son producidos e dirixidos por compañías de mulleres. Miradas diversas sobre “o feminino”.

Incluímos na programación unha pequena mostra do traballo de Fernanda Cabrera.

Fernanda Cabrera Varela, persoa fundamental da historia dos títeres en Galiza, formouse en Barcelona no Institut del Teatre con H. V. Tozer.

No ano 1981 regresa a Galiza e funda xunto a Rafael Vázquez Nuñez a compañía Marionetas Trécola recuperando a tradición dos títeres e as marionetas de fíos.

Loitadora tenaz e enérxica non escatimou esforzos para por en valor a marioneta como ferramenta da dramaturxia e conseguir  o recoñecemento e dignificación tanto das compañías de marionetas como dos seus espectáculos.

Impulsora dos primeiros circuítos de distribución galegos, Domingos de furabolos.

Formou parte da Asociación de titiriteiros galegos  que no ano 1985 organiza o primeiro festival de marionetas de Galiza,  Mondoñedo Primeiro Festival Galego dos Titiriteiros.

As mans do seu fillo Ero Vazquez Cabrera e as de Isa García Coldeira continúan co traballo escénico de Marionetas Trécola, actualizando o seu repertorio clásico e creando novos espectáculos.

“Na casiña de Fernanda Cabrera” é uha exposición que se pode visitar no Museo Galego da Marioneta, arredor da casiña, teatriño creado por Fernanda e Seara para o espectáculo “Nº 8 rúa dos contos” de Marionetas Trécola; pódense ver nesta mostra fotografías, marionetas, bocetos, carteis e folletos que nos dan unha idea do inmenso traballo realizado por Fernanda Cabrera.

O pasado día 18 de agosto inaugurouse esta exposición e a compañía Trécola representou “Nº 8 rúa dos contos” no elenco de marionetistas figuraban Ero Vázquez, fillo de Fernanda, a súa compañeira Isabel García e Ura García, neta de Fernanda, é a única compañía en activo en Galicia na que participan 3 xeracións de marionetistas.

Publicado en Exposicións, Fondos, Programación | Etiquetado , , , , | 1 comentario

Mamulengo. Bonecos no Museo Galego da Marioneta

Con motivo do Titerentroido 2017 celebrouse no Museo Galego da Marioneta a exposición Mamulengo. Teatro Popular de Bonecos do Brasil. Marcos Pena e Izabela Brochado de Trapusteros Teatro trouxéronos esta exposición e fixeron unhas representacións deste teatro popular de bonecos do Brasil.

Ao remate da exposición Marcos Pena e Izabela Brochado fixeron unha doazón de bonecos ao Museo Galego da Marioneta, bonecos que pasan a formar parte da colección deste museo.

Na rexión Nordeste do Brasil o teatro popular de marionetas recibe ás denominacións de  Mamulengo, Babau, João Redondo e Casimiro Coco, estes nomes están relacionados respectivamente aos estados de Pernambuco, Paraíba, Rio Grande do Norte e Ceará. O termo máis utilizado para designar o teatro de bonecos popular do Nordeste é Mamulengo.

Estes son os bonecos doados:

Cavaleiro

Bonequeiro: José Lopes

Grupo Mamulengo Teatro Riso, Glória de Goitá, Pernambuco.

Capataz 

Bonequeiro: Carlos 

Grupo Mamulengo Teatro Riso, Glória de Goitá, Pernambuco.

Quitéria

Bonequeira: Larissa Lopes,

Grupo Mamulengo Teatro Riso, Glória de Goitá, Pernambuco.

Estes bonecos foron confeccionados en xaneiro e febreiro de 2017 por membros do Teatro Riso de Gloria de Goitá en Pernambuco. Grupo creado por Jose Lopes da Silva-filho (Zé Lopes),  recoñecido e bonequeiro.

Para ampliar información sobre o mamulengo pódese  consultar o Dossier do Teatro de Bonecos Popular do Nordeste traballo coordinado por Izabela Costa Brochado.

Publicado en Exposicións, Fondos | Etiquetado , , , | Deixar un comentario

Exposición: Mamulengo. Teatro Popular de Bonecos do Brasil

Con motivo do XVI Titerentroido pódese visitar esta exposición  no Museo Galego da Marioneta do 15 ao 28 de febreiro .

A comisaria da exposición é a  Profesora Izabela Brochado, da Universidade de Brasilia, forma parte da compañía Trapusteros Teatro, compañía que tamén participa neste Titerentroido coa obra Este conto não é meu. O día 28 estará no Museo Municipal Ramón Mª Aller en funcións de mañá e tarde.20170214_175501

A exposición componse de bonecos e fotografías do Mamulengo, Tradición brasileira do teatro de marionetas que acaba de recibir o título de Patrimonio Cultural do Brasil.

Na rexión Nordeste do Brasil o teatro popular de marionetas recibe ás denominacións de  Mamulengo, Babau, João Redondo e Casimiro Coco, estes nomes están relacionados respectivamente aos estados de Pernambuco, Paraíba, Rio Grande do Norte e Ceará. O termo máis utilizado para designar o teatro de bonecos popular do Nordeste é Mamulengo.

A exposición consta de 18 bonecos de varios mestres que abarcan personaxes-tipo significativos que nos proporcionan un panorama amplo do Mamulengo brasileiro.

Ademais expóñense 50 fotogrl1208185afías que retratan diversos aspectos deste teatro popular (mestres, tipoloxías dos personaxes, representacións, procesos de traballo…)

No día da exposición Izabela Brochado realizou unha visita guiada e o grupo Trapusteros Teatro (Izabela Brochado e Marcos Pena)  deleitounos cunha representación De Bambu e a Morte do Mestre José Divina, de Pernambuco. Esta representación, foi realizada con bonecos da propia exposición. Os asistentes tiveron así a oportunidade de ver estas marionetas en movemento e ter unha noción máis clara do Mamulengo en cuanto fenómeno teatral.

 

Esta exposición danos a oportunidade de coñecer o Teatro de Bonecos Popular do Nordeste e comprender ás razóns polas que este teatro forme parte do Patrimonio Cultural do Brasil.

This slideshow requires JavaScript.

Para saber máis:

Teatro de Bonecos Popular do Nordeste. Patrimonio Cultural Inmaterial

Dossier do Teatro de Bonecos Popular do Nordeste

Publicado en Exposicións, Programación | Etiquetado , , , , , | 1 comentario